Category Archives: 5 mosaic

isubo

itong tamis
katumbas ay hapis
pagpapahirap tinitiis
tuloy ang pagmamalabis

itong alat
katumbas ay sumbat.
kahit ikaw pa ay salat
iyo pa raw ipagpasalamat.

itong asim
katumbas ay dilim.
pagkatakot ay kay lalim
sa kanyang banta ng lagim.

itong pait
katumbas ay galit.
ang karapatang pinagkait
di ibibigay kahit pa igiit.

hala, sige… isubo!

saka bibig ay itikom,
‘wag magreklamong gutom.
di ba’t ikaw raw ay pinakain?
kaya’t nilayong alipinin.

Advertisements

isaksak mo…

iyo na ang tubig
na sinlabo ng dilim
sa malalim na balon
ng kaluluwa mong uhaw.

iyo na ang hangin
na sinlamig ng lungkot
sa hungkag na yakap
ng bisig mong sabik.

iyo na ang lupa
na sintigas ng galit
sa manhid na damdamin
ng mundo mong tigang.

iyo na ang panahon
na simbagal ng paghilom
sa mahapding nakaraan
ng buhay mong mapait.

iyo na ang ginto
na singkinang ng tukso
sa nakamkam na yaman
ng ligaya mong huwad.

iyo na ang wika
na simbabaw ng biro
sa hangal na ingay
ng diwa mong baluktot.

iyo na ang lahat
angkinin mong tanan!
iyo na!
iyo pa ang hapis.


iluwa

sukat ba namang napalaki ng nakagat mo
at hindi mo makayanang nguyain ito!

akala’y laging mauubusan,
umiral itong katakawan!
paglunok ma’y ipagpilitan,
tiyak namang mabubulunan!

sa kaunti kasi’y di makuntento,
itong ganid kung kumabig todo.
di mapanindigan ang sinubo,
mapipilitang iluwa ng buo.

pakakawalan na lamang
ang pagkakataong sinagpang.
bagay na kapag binitiwan,
di na maaari pang balikan.


daliri

ang kaliwa
balisa.
ang tiwala
saliwa.
ang bihasa
timawa.

ang kawani
tiwali.
ang nahuli
nasisi.
ang mabuti
nasali.


manimbang

ang pinakikinabangan
dapat bang pagkaitan?
kung sulit naman
dapat bang panghinayangan?

itong inutil nga naman
dahil napagbibigyan,
nakuha pang magyabang,
kung mangikil sukdulan.

kanyang kabuktutan
tatagas, pigilan man.
pandaraya at katiwalian
masisiwalat kalaunan.

di siya payag masapawan,
ang mabuti’y pupulaan.
kalampag na palatandaan
ng latang walang laman.

mga tanong pag-isipan.
alin ang pahahalagahan,
ang butas bang sisidlan
o ang may pakinabang?


uhaw nga

ito ba ang sagot

sa inip at bagot,

kung inda ang kirot

ng kapos sa likot?

 

nang sa pusong pagod

ang lamig humagod,

ang init kumayod,

ang tamis sumugod.

 

‘tigil mo ‘yan, sabi!

sigaw mong matindi,

tila ba kay laki

ng pagkakamali.

 

ang uminom nga ba

tingin mo’y masama?

pipigilan mo ba kung

ako’y uhaw nga?


dapat ba?

dapat ka bang umasang sagutin

kung di ka nagsasalita?

dapat ka bang umuwi

kung di ka na doon nakatira?

dapat ka bang humiga

kung di lang iyo ang kama?

dapat ka bang humiling

kung ibinigay mo sa iba?

dapat ka bang magsimula

kung tapos na?