Tag Archives: poem

nagbebenta ng hilaw

Hilaw?

Hindi luto.

Kulang sa tuon.

Alanganin pa, hinain na.

Hilaw?

Hindi hinog.

Kulang sa panahon.

Pinilit kahit bubot pa.

Hilaw?

Hindi ganap.

Kulang sa sikap.

Bitin, paanong papasa?

Matabang.

Mapusyaw.

Mababaw.

Kulang.

Hilaw.

‘Yan ba ang binebenta mo?

Ay, hilaw.

Art: Photo manipulation of original collage “Puwang 3 – Tulala”

by Rica

Advertisements

kwentong kusinero

Minsan may isang kusinero

Mahusay raw magluto.

Naisipan at nagpasya

Magbukas ng karinderia.

Mga putahe niyang likha

Tila inilutong mga katha.

Kapag sahog tinilad na

Sa pakinig ay makinilya.

Nagsimulang mag-akda,

Isa-isang ipakikilala

Mga magsisipagganap

Sa kwentong ilalaga.

At nang rekado’y pinakuluan

Kapanapanabik ang tagpuan.

Samantala, sa isang kawali

Sumagitsit yaring mantika.

Nang ang bida ay ginisa,

Tumilamsik ang hidwaan.

Matindi ang bakbakan,

Pinirito ang kalaban.

Malapelikula ang timpla.

Pihadong patok sa takilya.

May lambing ang tamis,

May tampo ang alat.

Madrama ang lasa.

Nangurot ang asim,

Nanipa ang anghang.

Maaksyon ang sawsawan.

Sariwa ang mga sangkap.

Malutong ang mga kataga.

Malinamnam ang mga damdamin.

Masabaw ang mga talinhaga.

Masustansiya ang diwa.

Busog ang mga mambabasa.

Art: “Quilt”

by Rica

gelpen on paper


you are my density

You are my density.

You shift my buoyancy.

You are dimensionless.

That’s what you are.

You count my every mass,

How much my volume has.

You’re not just heaviness,

You mean more than weight to me.

You are my density,

Specific gravity.

You are my cognizance.

That’s what you are.

#iridium


puwing II

Mga titik na naipit

Mga patinig na napagpalit

Mga salitang nagkandirit

Mga kudlit na sumingit

Mga gitling na nawaglit

Kay rami nang ng

Sindami ng nang

May labis, may kulang…

Pinalalampas lang.

Mga naipong puwing

Sa mapaniil na piring

Ng pangambang makasaling.

Tama nga bang sarilinin?

Art: “Words”

by Rica

colored pencil on paper


Kung paanong humagupit ang kirot

Ang hapis ay manlalatigo

paris ng matalas na kidlat

na gugulpi sa inaakala mong taglay pang tapang,

pagdaka ika’y sasakalin

nang masaid ang iyong lakas

upang dugo ang mapiga

sa iyong pagluha.

#kirotsapagkaabo

Photo:https://m.facebook.com/cornycopiabyiris/


Kung paanong manlihis ang kirot

Ang pagkatuliro ay hahampas

na sintindi ng marahas na alon,

pupunitin ang iyong ulirat

at aanurin ang mga pilas papalayo

hanggang sa ikalunod mo

ang pagkukumahog na mahagilap

ang mga retaso ng iyong diwang gula-gulanit.

#kirotsapagkaabo

Photo: https://m.facebook.com/cornycopiabyiris/


Kung paanong sumambulat ang kirot

Ang pagdurusa ay gumigiba na parang masong wawasak sa nalalabi mong marupok na pananalig

upang pasabugin ang iyong pagkatao bilang bubog,

at ang iyong kaluluwa ngayo’y mistulang masangsang na ginutay na laman.

#kirotsapagkaabo

Photo:https://m.facebook.com/cornycopiabyiris/