Tag Archives: tula

para kang libro

Yaon bang may pabalat
Na madalas husgahan.
At mayroong pamagat
Na kayraming kahulugan.

Nang buklatin ka’y simulan ko
Niyakag ako ng mga pahina.
Kaya’t mundo mo’y pinasok ko
Upang angkinin ng sarili kong unawa.

Yaon bang mga hinuha
Ang mapang aking ginamit.
Yaon bang mga sapantaha
Ang sa landas ipinangguhit.

Nilibot ko ang mga talata.
Nilakbay ang mga pangungusap.
Binaybay ko ang mga salita.
Ang sarili ko’y sa iyo nahanap.

Yaon bang ayaw kitang tigilan
Ngunit pananabik ko’y dapat tiisin.
Yaon bang kayraming gustong malaman
Ngunit kwento mo’y ayaw tapusin.

Pangamba’y ‘pag umabot sa dulo,
Mararating ko ang wakas.
Kung paraiso mo’y maglalaho,
Mapupuno ng lumbay ang bukas!

Yaon bang abot kamay na,
Saka pa kusang bibitawan.
Yaon bang bibitinin pa,
Kung kailan nasa kasagsagan.

Kaya’t ipipinid pansamanatala
Saka panaka-nakang bubuklatin.
Tanging ligayang sa’yo nabasa
Aking uunti-untiin, susulitin!

Advertisements

‘di laan

Nang nilisan, nagkapuwang itong naiwan. Ngunit kakulangan huwag panghinayangan. Ang ayaw manahan, dapat pakawalan. ‘Di dapat ipagpilitan kung ‘di rin lang laan. Kaya’t ang puwang tabunan, tuluyang kalimutan.


paano

paano kung…

kung kailan…

paano kapag…

kapag nangyari…

paano pa, tapos na.

tapos, paano na?


bato

Hating-gabi nang makipag-piko

At natisod ang lelang mo

Sa isang aninong baluktot!

Ang may-ari naman nito

Nangatwiran pang palusot.

Dahil ba magaan ang bangko

Kaya’t hindi naisipang umupo?

Ang hiwaga kuno ng kwago,

Bunyag sa pukol ng pamato.

Natisod nga pati ang lelong mo

Nilang sa may diban nangagsiupo.

Bihasa nga sila sa patintero

Pagkat may sandok ang kanilang guro.

Art by Rica


nagbebenta ng hilaw

Hilaw?

Hindi luto.

Kulang sa tuon.

Alanganin pa, hinain na.

Hilaw?

Hindi hinog.

Kulang sa panahon.

Pinilit kahit bubot pa.

Hilaw?

Hindi ganap.

Kulang sa sikap.

Bitin, paanong papasa?

Matabang.

Mapusyaw.

Mababaw.

Kulang.

Hilaw.

‘Yan ba ang binebenta mo?

Ay, hilaw.

Art: Photo manipulation of original collage “Puwang 3 – Tulala”

by Rica


kwentong kusinero

Minsan may isang kusinero

Mahusay raw magluto.

Naisipan at nagpasya

Magbukas ng karinderia.

Mga putahe niyang likha

Tila inilutong mga katha.

Kapag sahog tinilad na

Sa pakinig ay makinilya.

Nagsimulang mag-akda,

Isa-isang ipakikilala

Mga magsisipagganap

Sa kwentong ilalaga.

At nang rekado’y pinakuluan

Kapanapanabik ang tagpuan.

Samantala, sa isang kawali

Sumagitsit yaring mantika.

Nang ang bida ay ginisa,

Tumilamsik ang hidwaan.

Matindi ang bakbakan,

Pinirito ang kalaban.

Malapelikula ang timpla.

Pihadong patok sa takilya.

May lambing ang tamis,

May tampo ang alat.

Madrama ang lasa.

Nangurot ang asim,

Nanipa ang anghang.

Maaksyon ang sawsawan.

Sariwa ang mga sangkap.

Malutong ang mga kataga.

Malinamnam ang mga damdamin.

Masabaw ang mga talinhaga.

Masustansiya ang diwa.

Busog ang mga mambabasa.

Art: “Quilt”

by Rica

gelpen on paper


puwing II

Mga titik na naipit

Mga patinig na napagpalit

Mga salitang nagkandirit

Mga kudlit na sumingit

Mga gitling na nawaglit

Kay rami nang ng

Sindami ng nang

May labis, may kulang…

Pinalalampas lang.

Mga naipong puwing

Sa mapaniil na piring

Ng pangambang makasaling.

Tama nga bang sarilinin?

Art: “Words”

by Rica

colored pencil on paper