Tag Archives: tula

Kung paanong humagupit ang kirot

Ang hapis ay manlalatigo

paris ng matalas na kidlat

na gugulpi sa inaakala mong taglay pang tapang,

pagdaka ika’y sasakalin

nang masaid ang iyong lakas

upang dugo ang mapiga

sa iyong pagluha.

#kirotsapagkaabo

Photo:https://m.facebook.com/cornycopiabyiris/

Advertisements

Kung paanong manlihis ang kirot

Ang pagkatuliro ay hahampas

na sintindi ng marahas na alon,

pupunitin ang iyong ulirat

at aanurin ang mga pilas papalayo

hanggang sa ikalunod mo

ang pagkukumahog na mahagilap

ang mga retaso ng iyong diwang gula-gulanit.

#kirotsapagkaabo

Photo: https://m.facebook.com/cornycopiabyiris/


Kung paanong sumambulat ang kirot

Ang pagdurusa ay gumigiba na parang masong wawasak sa nalalabi mong marupok na pananalig

upang pasabugin ang iyong pagkatao bilang bubog,

at ang iyong kaluluwa ngayo’y mistulang masangsang na ginutay na laman.

#kirotsapagkaabo

Photo:https://m.facebook.com/cornycopiabyiris/


Kung paanong maminsala ang kirot

Ang kabiguan ay raragasang

gaya ng pagguho ng lupa

na tatabon sa iyong nalalabing pananampalataya,

at babalutin ng karimlan

ang pinanghahawakan mong pag-asa

upang itulak ito sa walang-hangganang pagdausdos.

#kirotsapagkaabo

Photo: https://m.facebook.com/cornycopiabyiris/


Kung paanong umalingawngaw ang kirot

Ang hinagpis ay nanunuot

tulad ng walang-sawang paglaslas

sa kaibuturan ng iyong

mga gunita ng ligaya,

upang isa-isang isalin

bilang mga tiling kumakatha

ng isang masalimuot

at nakaririnding ingay.

#kirotsapagkaabo

photo: https://m.facebook.com/cornycopiabyiris/


katay

Habang ang mga bagay na umiinog sa iyong isipan

Ay nagmamadaling pumanaog sa iyong lalamunan

Ang iyong puso ay nabagabag sa pagpapasya

Kung ang mga ito ba ay dapat bang pawalan.

Mangangahas ka ba?

Pagkat ang umimik

Ay makipagsapalaran.

Ang mapakinggan o mabale-wala.

Ang mapaniwalaan o matutulan.

Ang mapahalagahan o mapintasan.

Ang mahangaan o mapagtawanan.

Mga paniniwala ay papaslangin.

Mga kaisipan ay tatadtarin.

Ang haraya ay pupugutan.

Ang pangungusisa ay sasakalin.

Ang iyong isip ay papatayin.

Bubuksan mo ba ang iyong bibig

Dahil sa kagustuhang makasihan,

At isalang ang sarili upang makatay?

Photo credits:

https://m.facebook.com/cornycopiabyiris/


lunok

At dito sa aking dila

Pait mo ay nagdagta.

Lalagok upang lunurin,

Saka ng tubig anurin.

Paglunok nga ay ganap.

Pagsuko ay pagtanggap.

Sa’yong bangis aasa

Makamit ang ginhawa.

‘Pag tigas ay nalusaw,

Bisa mo’y makakanaw.

Sa apoy ay lulupig,

Sa sakit magdaraig.

Kapag init humupa,

Sa ginaw napalaya.

Matigmak man ng pawis

Naibsan itong hapis.

Photo credits:

https://m.facebook.com/cornycopiabyiris/